ဇူလိုင်လ ၂၄၊ ၂၀၂၅
GG (VOM)
လေဆင်နှာမောင်းတိုက်ခတ်မှုကြောင့် မွန်ပြည်နယ်အတွင်းရှိ ပေါင်မြို့နယ်၊ကျိုက်ထို နဲ့ သထုံမြို့နယ်တွေမှာ နေအိမ်အဆောက်အဦးရာနဲ့ချီပြီး ထိခိုက်ပျက်စီးမှုဖြစ်ပွားခဲ့တယ်လို့ဒေသခံတွေဆီမှသိရပါတယ်။
ဒီနေ့ ဇူလိုင် ၂၄ ရက်နေ့ ၇ နာရီခွဲလောက် မှာ လေဆင်နှာမောင်း တိုက်ခတ်မှုဖြစ်ပွားခဲ့တာဖြစ်ကြောင်း ပေါင်မြို့နယ်မှာဆိုရင် ရန်ကုန် – မော်လမြိုင်ကားလမ်းဘေး ပေါင်းရပ်ကွက်၊ ဝင်းခလုံးရပ်ကွက်၊ ထားဝယ်စုနဲ့ မိုးနိုင်း ရပ်ကွက်တွေကနေအိမ် ၁၀၀ လောက်ထိခိုက်ပျက်စီး ခဲ့တာဖြစ်ပါတယ်။
နေအိမ်တွေ ထိခိုက်ပျက်စီးခဲ့သလို လူထိခိုက်ဒဏ်ရာရတာတွေလည်းရှိကြောင်း ၊ သစ်ပင်နဲ့ ဓာတ်တိုင်တွေ ရန်ကုန် – မော်လမြိုင်ကားလမ်းပေါ် လဲကျပိတ်ဆို့မှုဖြစ်ပွားခဲ့တဲ့အတွက်လည်း ကားလမ်း ယာယီပိတ်ဆို့မှုဖြစ်ပွားခဲ့တယ်လို့သိရပါတယ်။
” အိမ်တွေကတော့တော်တော်ကို ပျက်စီးတာများတယ်။သစ်သားအိမ်လေးတွေကတော်တော်ပျက်စီးတယ်။နှစ်ထပ်အိမ်တွေ ၊တထပ်အိမ်တွေအကုန်ပါတယ်။လမ်းမကြီးဘေးတလျောက်ကပိုထိတယ်။အပင်တွေလည်းများတယ်။အိမ်တွေကတော့ သူတို့အစီအစဥ်နဲ့သူတို့လုပ်နေကြတယ်။လမ်းပိုင်းရှင်းလင်းရေးကတော့အခုပြီးသွားပါပြီ။ မနက် ၇ နာရီခွဲလောက်တိုက်တဲ့ လေဆင်နှာမောင်းကြောင့် အကုန်ထိခိုက်တာ။ကျွန်တော်တို့သက်တမ်းတလျှောက်ခုလို လေပြင်းတာ ဒါကဒုတိယအကြိမ်ပါ။အရင် နှစ် ၂၀ ကျော်လော်က တခါခုလိုမျိုးဖြစ်ဘူးသေးတယ် ။” လို့ ပေါင်မြို့နယ် စိတ္တသုခလူမှုကူညီရေးအသင်းတာဝန်ရှိသူကပြောပါတယ်။
ပေါင်မြို့နယ် အပြင် ကျိုက်ထိုမြို့နယ်မှာ ဒီနေ့မနက် ၉ နာရီလောက်က လေဆင်နှာမောင်းတိုက်ခတ်မှုကြောင့် မလော့ချောင်ကျေးရွာ အလယ်ပိုင်းနှင့် ကျွဲတဲစု တို့မှာ လူနေအိမ်တွေ ထိခိုက်ပျက်စီးမှုရှိခဲ့တယ်လို့သိရပါတယ်။
နောက်ပြီး သထုံမြို့နယ်မှာတော့ မနက် ၇ နာရီလောက်မှာ လေဆင်နှာမောင်း တိုက်ခိုက်ပြီး နောင်ကုလားအလယ်ရွာမြောက်ပိုင်းကနေအိမ် ၂၀ ထက်မနည်း ထိခိုက်ပျက်စီးခဲ့ပြီး နေအိမ်အချို့က ပြိုကျပျက်စီးတဲ့အထိဖြစ်ပွားခဲ့တယ်လို့သိရပါတယ်။
” နောက်ကုလားဘက်မှာ တော်တော်ထိတယ်။သစ်သာအိမ်တချို့ဆိုလုံးလုံးပြိုကျသွားတယ့။ကျန်တဲ့အိမ်တော်တော်များများက အမိုးတွေလန်တယ်။ပျက်စီးတယ် ။ မီးသတ်ကလည်း ကူညီရေးရောက်နေပါတယ်။” လို့ ဒေသခံက ပြောပါတယ်။
ဒီနေ့ ဇူလိုင် ၂၄ ရက်နေ့မှာ မွန်ပြည်နယ်အပြင် ရန်ကုန်တိုင်းအပါအဝင် အခြားဒေသဒေသတွေမှာလည်း လေဆင်နှာမောင်တိုက်ခိုက်မှုကြောင့် သစ်ပင်တွေလဲခြင်း ၊ဓာတ်တိုင်တွေလဲကျခြင်း ၊ နေအိမ်တွေထိခိုက်ပျက်စီးခြင်း ၊ ကားတွေ ထိခိုက်ပျက်စီးမှု တွေရှိခဲ့တယ်လို့ သိရပါတယ်။
ဓာတ်ပုံ – ဒေသခံ
